-->

هاني

زين العابدين خيري

كان الولد هاني

درويش صحابه كتير

غرقان في قاع البير

عاشق يقول مواويل

وإكمن قلبه كبير

كان ياما بيعاني

كان الولد هاني

كان الولد درويش

يبكي ف عز الطيش

بيطير كأنه الريش

ويدور كأنه الحلم

لو ييجي أو ما يجيش

لو حب قلبه يعيش

كان الولد درويش

كان الولد هاني وكان درويش

غامض كأنه السر

واسع كأنه البحر

ووحيد كأنه وحيد

وعنيد كأنه الصخر

ينزل كأنه مفيش

كان الولد هاني وكان درويش

كان الولد هاني وكان درويش وكان صاحبي

زي الصفا ساعة دفا بيبوح

زي الطوفان ساعة ميدان بيروح

زي الربيع وسط الجميع وردة

قلبه الخفيف وقت الخريف مجروح

لكنه ساعة الندا بيجيني لو يِحبي

كان الولد هاني وكان درويش وكان صاحبي

Top